पिकांची स्थिती, नुकसानीचे स्वरूप करून पंचनामे
दुष्काळी परिस्थितीच्या पार्श्वभूमीवर शेती व फळपिकांच्या झालेल्या नुकसानीचे पंचनामे तातडीने पूर्ण करण्याच्या सूचना शिरूर अनंतपाळ तहसीलदार किशोर यादव यांनी दिल्यानंतर तालुक्यातील विविध गावांमध्ये पंचनाम्याच्या कामास गुरुवारपासून सुरुवात करण्यात आली आहे. त्यामध्ये अजनी (बु.), तळेगाव, बाकली यासह परिसरातील गावांमध्ये प्रशासनाकडून शेतकऱ्यांच्या बांधावर जाऊन प्रत्यक्ष पाहणी करण्यात येत आहे. सध्या प्रामुख्याने ऊस आणि सोयाबीन सह फळ बाग पिकांच्या नुकसानीचे पंचनामे केले जात आहेत. ग्राम महसुल अधिकारी श्यामसुंदर राजवंश , कृषी सहाय्यक गजेंद्र कोल्हापुरे , सोमा पंचाक्षरी यांनी शेतावर जाऊन पिकांची स्थिती, नुकसानीचे स्वरूप व क्षेत्राची पाहणी करून पंचनामे नोंदवित आहेत. दुष्काळी परिस्थितीमुळे शेतकऱ्यांचे मोठे नुकसान झाले असून, पंचनाम्याच्या आधारे शासनाकडून मिळणाऱ्या मदतीकडे शेतकऱ्यांचे लक्ष लागले आहे. पंचनाम्याचे काम वेळेत व पारदर्शकपणे पूर्ण करण्यासाठी प्रशासनाकडून प्रयत्न सुरू आहेत.