रोटरी क्लबने साजरा केला अभियंता दिन; आठ अभियंत्यांचा सन्मान

चोपडा येथील रोटरी क्लबने भारतरत्न सर मोक्षगुंडम विश्वेश्वरैया यांच्या जन्मदिवसानिमित्त राष्ट्रीय अभियंता दिन साजरा केला. या निमित्ताने आयोजित कार्यक्रमात आठ अभियंत्यांचा त्यांच्या योगदानाबद्दल सन्मान करण्यात आला. श्रीमती शरदचंद्रिका पाटील तंत्रनिकेतनचे प्राचार्य व्ही. एन. बोरसे यांनी अभियंत्यांचे राष्ट्रनिर्मितीतील योगदान अधोरेखित केले. विविध क्षेत्रांतील अभियंते आपल्या कल्पकतेतून मानवी जीवन अधिक सुखकर व सुलभ करण्यासाठी महत्त्वपूर्ण कार्य करीत असल्याचे त्यांनी सांगितले. कार्यक्रमाच्या प्रारंभी सर मोक्षगुंडम विश्वेश्वरैया यांच्या प्रतिमेला मान्यवरांच्या हस्ते पुष्पहार अर्पण करण्यात आला. रोटरी भवन येथे झालेल्या या सोहळ्यात रोटरी क्लबचे अध्यक्ष संजय बारी, मानद सचिव लीना पाटील व प्रकल्प प्रमुख ध्रुमील अग्रवाल उपस्थित होते. संजय बारी यांनी अभियंत्यांच्या कार्याचे कौतुक करून त्यांना शुभेच्छा दिल्या. आशिष गुजराथी यांनी सर विश्वेश्वरैया यांच्या जीवनकार्याचा परिचय करून देताना त्यांचे खानदेशाशी असलेले नाते स्पष्ट केले. यावेळी रोटरी सदस्य असलेल्या आठ अभियंत्यांचा त्यांच्या विशेष योगदानाबद्दल सन्मान करण्यात आला. यामध्ये विलास एस. पाटील, प्रकाश बी. पाटील, आशिष गुजराथी, संतोष बाविस्कर, शशिकांत पाटील, मनोज पाटील, ध्रुमील अग्रवाल आणि लीना पाटील यांचा समावेश होता. या अभियंत्यांनी आपल्या कामातून समाजासाठी मोठे योगदान दिले आहे. कार्यक्रमात रोटरी क्लबच्या माजी अध्यक्षा तथा भगिनी मंडळ संस्थेच्या अध्यक्षा पूनम गुजराथी यांना ‘रायझिंग स्टार’ पुरस्काराने गौरविण्यात आले. सूत्रसंचालन विलास पी. पाटील व गौरव महाले यांनी केले, तर आभार लीना पाटील यांनी मानले. कार्यक्रमास रोटरी सदस्यांची लक्षणीय उपस्थिती होती.