अमित शाह यांनी यंत्रणांचे केले अभिनंदन, तस्करावर गुन्हा दाखल
केंद्रीय गृहमंत्री अमित शाह यांनी अंमली पदार्थांच्या तस्करीतील कुख्यात सूत्रधार नवप्रीत सिंग याला तुर्कीमधून भारतात परत आणण्याच्या मोहिमेत यश मिळवल्याबद्दल सर्व संबंधित यंत्रणांचे अभिनंदन केले आहे. 'नवाब विर्क' या बनावट नावाने तुर्कीचे नागरिकत्व मिळवूनही, अफगाणिस्तानातून भारतात हेरॉइन आणि मेथाम्फेटामाइनची तस्करी सुरूच ठेवणाऱ्या नवप्रीत सिंगला आज भारतात आणण्यात आले. त्याच्यावर अंमली पदार्थांची तस्करी आणि इतर गुन्ह्यांचे आरोप असून त्याला तुरुंगात ठेवण्यात आले आहे. डिसेंबर 2029 पूर्वी अंमली पदार्थांच्या तस्करीच्या प्रत्येक संघटित प्रयत्नांचा समूळ नायनाट करण्यासाठी मोदी सरकार कटिबद्ध असल्याचे शाह यांनी सांगितले. मोदी सरकारने फरारी आरोपींना परत आणण्यासाठी एक समन्वित मोहीम हाती घेतली आहे. पंतप्रधान नरेंद्र मोदी यांच्या दूरदृष्टीनुसार 'जागतिक स्तरावर संपर्क', 'भक्कम समन्वय' आणि 'चतुर मुत्सद्देगिरी' या त्रिसूत्रीवर भर देण्यात आला आहे. 2019 मध्ये राष्ट्रीय तपास यंत्रणा (NIA) सुधारणा कायदा आणि बेकायदेशीर कारवाया प्रतिबंधक कायदा (UAPA) संमत केल्यानंतर, 2020 पासून फरारी गुन्हेगारांना भारतात परत आणण्याची प्रक्रिया 'मिशन मोड'वर सुरू झाली. या मोहिमेमुळे कारवाईची व्याप्ती वाढली असून, परदेशात कार्यरत असलेले वैयक्तिक दहशतवादी, त्यांचे सूत्रधार, आर्थिक पुरवठादार आणि त्यांना मदत करणाऱ्या इतर यंत्रणांचाही यात समावेश करण्यात आला आहे.