ग्रामसभेत एकमताने ठराव मंजूर
पिळोदा ग्रामपंचायतीने गावात बालविवाह रोखण्याचा एकमताने ठराव मंजूर केला आहे. या महत्त्वपूर्ण निर्णयामुळे गावाला बालविवाहमुक्त करण्याच्या दिशेने एक मोठे पाऊल उचलले गेले आहे. आधार बहुउद्देशीय संस्था, अमळनेरच्या 'जस्ट राईट फॉर चिल्ड्रन' या प्रकल्पांतर्गत या संकल्पाबाबत जनजागृती करण्यात आली. या जनजागृती कार्यक्रमात बालविवाहाचे दुष्परिणाम, मुलींच्या शिक्षणाचे महत्त्व, बालविवाह प्रतिबंधक कायदा आणि बालकांच्या हक्कांबाबत उपस्थितांना सविस्तर माहिती देण्यात आली. कार्यक्रमात विद्यार्थ्यांनी बालविवाहाच्या दुष्परिणामांवर आधारित एक प्रभावी पथनाट्य सादर केले. या पथनाट्यातून बालविवाहामुळे मुलींच्या शिक्षण, आरोग्य आणि भविष्यावर होणारे गंभीर परिणाम स्पष्टपणे दर्शविण्यात आले, ज्यामुळे उपस्थितांचे लक्ष वेधले गेले. पिळोदा ग्रामपंचायतीच्या सभेत हा ठराव एकमताने मंजूर करण्यात आला, ज्यामध्ये गावातील नागरिकांना बालविवाह रोखण्यासाठी आणि मुला-मुलींना शिक्षणाची समान संधी देण्यासाठी सातत्याने जनजागृती करण्याचे आवाहन करण्यात आले. आधार बहुउद्देशीय संस्थेच्या अध्यक्ष भारती पाटील, संचालक रेणू प्रसाद, प्रकल्प समन्वयक आनंद पगारे, मोहिनी धनगर, समाधान पाटील तसेच श्रम साफल्य एज्युकेशनचे विद्यार्थी या कार्यक्रमाला उपस्थित होते. या सर्व मान्यवरांनी बालविवाहमुक्त गावासाठी ग्रामस्थांना प्रोत्साहन दिले. त्यांनी संबंधित यंत्रणेला बालविवाहाची माहिती मिळाल्यास त्वरित कळवण्याचे आवाहन केले.