समाजकार्य महाविद्यालयात विवाहपूर्व समुपदेशन कार्यशाळा उत्साहात
कवयित्री बहिणाबाई चौधरी उत्तर महाराष्ट्र विद्यापीठ, जळगावच्या आजीवन अध्यापन व विस्तार विभाग आणि भगिनी मंडळ संचलित समाजकार्य महाविद्यालय, चोपडा यांच्या संयुक्त विद्यमाने किशोरवयीन मुलींसाठी विवाहपूर्व समुपदेशन व्याख्यान कार्यशाळा घेण्यात आली. कार्यक्रमाच्या अध्यक्षस्थानी भगिनी मंडळाच्या अध्यक्षा पूनम गुजराथी होत्या. सहसचिव अश्विनी गुजराथी यांच्या हस्ते कार्यशाळेचे उद्घाटन झाले. प्रमुख पाहुण्या म्हणून भगिनी मंडळाच्या उपाध्यक्षा छाया गुजराथी तसेच विद्यापीठाच्या नियुक्त सिनेट सदस्य प्रा. डॉ. कांचन महाजन उपस्थित होत्या. यावेळी प्राचार्य डॉ. ईश्वर सौंदाणकर, उपप्राचार्य डॉ.आशिष गुजराथी, इनरव्हील क्लब ऑफ चोपडाचे पदाधिकारी व सदस्य उपस्थित होते. प्रा. डॉ. कांचन महाजन यांनी ‘विवाह म्हणजे दोन व्यक्तिमत्त्वांचे एकत्र येणे’ या विषयावर मार्गदर्शन केले. विवाह हा केवळ दोन व्यक्तींचा संबंध नसून दोन व्यक्तिमत्त्वे, कुटुंबे आणि जीवनदृष्टी यांचा समन्वय असल्याचे त्यांनी सांगितले. विवाहपूर्व काळात योग्य निर्णयक्षमता, संवाद, परस्पर समज आणि जबाबदारीची जाणीव आवश्यक असल्याचे त्यांनी स्पष्ट केले. अध्यक्षा पूनम गुजराथी यांनी ‘विवाहातील ॲडजस्टमेंट व समायोजन’ या विषयावर मार्गदर्शन करताना वैवाहिक जीवनात परस्पर आदर, संवाद, समजूतदारपणा आणि परिस्थितीनुसार सकारात्मक समायोजनाचे महत्त्व स्पष्ट केले. डॉ. रेवानंद पाटील यांनी विवाह व कौटुंबिक जीवनातील विविध पैलूंवर विद्यार्थिनींशी संवाद साधला. सेवानिवृत्त मुख्याध्यापिका जयश्री चव्हाण यांनी जीवनमूल्ये, जबाबदारी आणि योग्य निर्णय घेण्याबाबत मार्गदर्शन केले. आयुर्वेदाचार्य वैद्य प्राजक्ता महाले यांनी शारीरिक व मानसिक आरोग्य, निरोगी जीवनशैली आणि संघर्षनिवारण याबाबत मार्गदर्शन केले.