भुसावळ विभागातर्फे विशेष गौरव करण्यात आला.
ग्रामीण डाक जीवन विमा योजनेतील उत्कृष्ट कामगिरीबद्दल तानसिंग बारेला यांचा गौरव भारतीय डाक विभागाच्या ग्रामीण डाक जीवन विमा (RPLI) योजनेत उल्लेखनीय कामगिरी करत नागरिकांना जीवन विम्याचे महत्त्व पटवून देणारे वैजापूर येथील पोस्टमन तानसिंग भंग्या बारेला यांचा भुसावळ विभागातर्फे विशेष गौरव करण्यात आला. ग्रामीण व आदिवासी भागातील नागरिकांपर्यंत जीवन विम्याची माहिती पोहोचविणे, त्यांना आर्थिक सुरक्षिततेचे महत्त्व समजावून सांगणे तसेच पात्र नागरिकांना ग्रामीण डाक जीवन विमा योजनेशी जोडण्यासाठी तानसिंग बारेला यांनी सातत्याने प्रयत्न केले. त्यांच्या या उल्लेखनीय कामगिरीची दखल घेत भुसावळ विभागाचे अधीक्षक डाकघर यांच्या हस्ते त्यांना प्रशस्तीपत्र व सन्मानचिन्ह देऊन गौरविण्यात आले. ग्रामीण भागातील सर्वसामान्य नागरिक, शेतकरी, कामगार तसेच आर्थिकदृष्ट्या दुर्बल कुटुंबांसाठी जीवन विमा हा आर्थिक सुरक्षिततेचा महत्त्वाचा आधार ठरतो. या पार्श्वभूमीवर नागरिकांना विमा योजनांची माहिती देऊन योग्य मार्गदर्शन करण्याचे कार्य बारेला यांनी केले. त्यांच्या प्रयत्नांमुळे वैजापूर परिसरात ग्रामीण डाक जीवन विमा योजनेला चांगला प्रतिसाद मिळत असल्याचे सांगण्यात आले. या सन्मानाबद्दल वैजापूर पोस्ट कार्यालयातील अधिकारी-कर्मचारी तसेच परिसरातील नागरिकांकडून तानसिंग बारेला यांचे अभिनंदन करण्यात आले. त्यांच्या कार्यामुळे डाक विभागातील इतर कर्मचाऱ्यांनाही उत्कृष्ट सेवा देण्यासाठी प्रेरणा मिळेल, अशी भावना यावेळी व्यक्त करण्यात आली. यावेळी डाक विभागातील अधिकारी व कर्मचारी उपस्थित होते.